Job 8

Inkulumo kaBhilidadi

1 UBhilidadi umShuhi wasephendula wathi:

2 “Koze kube nini ukhuluma izinto ezinjalo? Amazwi akho angumoya ophenquzayo.

3 Kambe uNkulunkulu uyakuhlanekela ukulunga na? Kambe uSomandla uyakuhlanekela okuhle na?

4 Lapho abantwabakho bona kuye, wabanikela isijeziso sokona kwabo.

5 Kanti nxa wena uzakhangela kuNkulunkulu uncenge kuSomandla,

6 nxa umsulwa uqondile, lamanje nje uzaphakama akusize akubuyisele esimeni sakho.

7 Lapho owaqalisa khona kuzakhanya sekukuncinyane, ngoba ngezinsuku ezizayo uzabe usuphumelela kakhulu.

8 “Buza abezizukulwane ezingaphambili udinge ukuthi okhokho babo bafundani,

9 ngokuba thina sizelwe izolo nje, kasazi lutho, lezinsuku zethu emhlabeni zilithunzi kuphela.

10 Kambe kaziyikukulaya zikutshele na? Kaziyikuletha amazwi okuzwisisa na?

11 Konje inqodi ingakhula ibende ingekho exhaphozini na? Imihlanga ingaqhela kungelamanzi na?

12 Nxa leyonqodi isakhula ingakaqunywa ijinge ibune masinyane kulotshani.

13 Sinjalo isiphetho sabo bonke abakhohlwa uNkulunkulu; litshabalala kanjalo ithemba lalowo ongakholwayo.

14 Lokho akuthembayo kufohlozeka lula; lokho eyeme kukho yibulembu besayobe.

15 Uyeyama kulobubulembu bakhe, kodwa bubhidlike; uyabambelela kubo, kodwa bukhithike.

16 Unjengesihlahla esithelelwa kakhulu sikhula elangeni, esisabalalisa izingatsha zaso esivandeni;

17 sinxibanise izimpande zaso enqumbini yamatshe, sizama ukuzuza ukugxila kuhle ematsheni.

18 Kodwa singasitshulwa kuleyondawo, leyondawo isisilandula ithi, ‘Angikaze ngikubone.’

19 Ngeqiniso impilo yaso iyabuna, ezinye izihlahla zibe zilokhu zikhula emhlabathini lowo.

20 “Ngeqiniso uNkulunkulu kamlahli umuntu ongelansolo futhi kaqinisi izandla zezigangi.

21 Ulokhu ezajinge agcwalise umlomo wakho ngohleko lezindebe zakho ngokumemeza ngentokozo.

22 Izitha zakho zizakwembathiswa ngehlazo, lamathente ababi azatshabalala.”